სირიის პარლამენტმა მხარი დაუჭირა I მსოფლიო ომის დროს ოტომანთა იმპერიის მიერ სომეხი ხალხის მასობრივი მკვლელობების გენოციდად აღიარებას.
პარლამენტმა ეს გადაწყვეტილება 13 თებერვალს მიიღო, - იმის ფონზე, რომ სირიასა და თურქეთს შორის ჩრდილოეთ სირიაში დაძაბულობა მატულობს.
სირიული პარლამენტის, სახალხო კრების დეპუტატებმა გადაწყვეტილება ერთხმად მიიღეს. პარლამენტი, „რადიო თავისუფლების“ ცნობით, მთლიანად პრეზიდენტ ბაშარ ალ ასადის მთავრობის მხარდამჭერებისგანაა დაკომპლექტებული.
თურქეთის საგარეო საქმეთა სამინისტრომ ამ ნაბიჯს ფარისევლური უწოდა და განაცხადა, რომ ასადის „რეჟიმის მიერ გამოწვეული ჰუმანიტარული ტრაგედია კიდევ გრძელდება“.
ოტომანთა იმპერიის ორგანიზებული მასობრივი გადასახლებისას აღმოსავლეთ ანატოლიიდან სირიის უდაბნოსა და სხვა ტერიტორიებზე ასობით ათასობით სომეხი დაიღუპა. მათი ნაწილი დახოცეს, ნაწილი კი შიმშილისა და ავადმყოფობებისგან დაიღუპა.
უამრავი ისტორიკოსი, სახელმწიფო და სომეხი ხალხი ამ პროცესს გენოციდს უწოდებს. თურქეთი არ უარყოფს, რომ დანაშაული იყო ჩადენილი, თუმცა ეწინააღმდეგება ტერმინ გენოციდის გამოყენებას და აცხადებს, რომ აღნიშნული ქმედებები არ ყოფილა „სომეხი ხალხის განადგურების სისტემური მცდელობა“.
სირიის პარლამენტის ეს გადაწყვეტილება იმ პერიოდს ემთხვევა, როდესაც სირიას, რომელსაც ზურგს შორის ჩრდილოეთ სირიაში, იდლიბის პროვინციაში სამხედრო შეტევა აქვს დაწყებული. როგორც „თავისუფლება“ წერს, იდლიბი სირიის ოპოზიციის „უკანასკნელი ბასტიონია“.