"ლელო საქართველოს" ლიდერი მამუკა ხაზარაძე "დიდი ეროვნული შერიგების" ინიციატივით გამოდის. ხაზარაძე მიმართვას ფეისბუქით ავრცელებს და იმ მიზეზებზე ვრცლად საუბრობს, რის გამოც ქვეყანაში მძიმე ეკონომიკური, სოციალური, პოლიტიკური და სამართლებრივი სიტუაციაა.
ხაზარაძე გავრცელებულ განცხადებაში წერს, რომ უნდა დაინიშნოს რიგგარეშე საპარლამენტო არჩევნები:

"...როგორ გადავრჩეთ?
ყველა დაპირისპირებული პოლიტიკური ძალა უნდა შეთანხმდეს ძირითად პრინციპებსა და მთავარ ღირებულებებზე! ქართული სული, ტრადიცია, კულტურა უნდა იყოს ყველა საქმის ამოსავალი წერტილი და საფუძველთა საფუძველი. უნდა ჩატარდეს რიგგარეშე საპარლამენტო არჩევნები, მოხდეს სასამართლოს რეფორმირება, მძლავრი ეკონომიკური პროგრამის შექმნა, ქვეყნისთვის ფუნქციის დაბრუნება, ყველა ინტელექტუალური ძალის, სამოქალაქო საზოგადოების მობილიზება და უნდა შედგეს - დიდი ეროვნული შერიგება!" ვკითხულობთ მამუკა ხაზარაძის მიმართვაში