კრემლის გადაწყვეტილებას, რომ დაწესებული შეზღუდვის ფარგლებში, რუსეთის ტერიტორიაზე შესვლა აეკრძალება ევროკავშირის ქვეყნების 8 მოქალაქეს, აშშ-ს სახელმწიფო მდივანი ეხმაურება:

ჩვენ ვუერთდებით ევროკავშირის ლიდერებს და ვგმობთ კრემლის ბრძანებას, ევროკავშირიდან რუსეთში, ოფიციალური პირების შესვლის აკრძალვაზე. ეს არის მოსკოვის მორიგი მცდელობა დააშინოს კრიტიკოსები. ჩვენი პარტნიორებისა და მოკავშირეების გვერდით, ჩვენ გვსურს უფრო კონსტრუქციული ურთიერთობა რუსეთთან, მაგრამ მან უნდა შეასრულოს თავისი საერთაშორისო ვალდებულებები"- წერს ბლინკენი „ტვიტერზე“.

რუსეთმა 8 პირს, მათ შორის ევროპარლამენტის პრეზიდენტს, ქვეყანაში შესვლა აუკრძალა. ამ გადაწყვეტილებას ევროკავშირის საპასუხო განცხადება მოჰყვა, სადაც ვკითხულობთ:

რუსეთის ქმედება მიუღებელია და მოკლებულია იურიდიულ საფუძველს. ის მიმართულია მთლიანად ევროკავშირის წინააღმდეგ და არ ეხება მხოლოდ ცალკეულ პირებს. ეს გადაწყვეტილება დემონსტრირებაა იმისა, როგორ აირჩია რუსეთის ფედერაციამ ევროკავშირთან დაპირისპირება ნაცვლად შეთანხმებისა, ჩვენი ორმხრივი ურთიერთობების გამოსწორებაზე. ევროკავშირი იტოვებს უფლებას მიიღოს შესაბამისი ზომები რუსეთის ხელისუფლების გადაწყვეტილების საპასუხოდ“, -აცხადებენ ევროპელი მაღალჩინოსნები.