პრემიერმინისტრი ირაკლი ღარიბაშვილი "მთავარი არხის" გენერალურ დირექტორს კიდევ ერთხელ თავს ესხმის და მას ეკლესიის წინააღმდეგ ბრძოლაში ადანაშაულებს.
ამ განცხადებით ღარიბაშვილი 17 ოქტომბერს "მთავარი არხის" ეთერში გასულ გადაცემას გამოეხმაურა, რომელშიც ნიკა გვარამიამ, მიხეილ სააკაშვილზე გაკეთებული მეუფე შიოს განცხადებები გააკრიტიკა.
ღარიბაშვილის თქმით, გადაცემა "კლასიკური მაგალითია", როგორ ებრძვის ნიკა გვარამია ეკლესიას.

"მე მინდა გამოვეხმაურო, ერთ-ერთი ყველაზე ანტისახელმწიფოებრივი პოლიტიკის გამტარებელ და მისი ბინძური პოლიტიკის გამტარებელ შეტევას, მეუფე შიოს წინააღმდეგ, არა მხოლოდ მეუფე შიოს წინააღმდეგ, მთელი ეკლესიის წინააღმდეგ, ეს არის კლასიკური მაგალით, როგორ ებრძვიან ისინი სახელმწიფოს, ეკლესიას, მთავარ ფუნდამენტს.
მოსახლეობის წინაშე ძალიან მარტივი არჩევანია დღეს, ერთის მხრივ არის, ხალხის სამსახურში მყოფი ქართული ოცნება, რომელმაც უკვე სამჯერ მიიღო ხალხის ხმა და მეორე მხარეს არის ანტისახელმწიფოებრივი ხალხის მჩაგვრელი, მწამებელი და ეკლესიის მტერი, გვარამია-სააკაშვილის-მელიას კრიმინალური ბანდა, რომელიც 30 ოქტომბერს დასრულდება და ქვეყანა მშვიდობიან განვითარებას გააგრძელებს", - თქვა ირაკლი ღარიბაშვილმა.