სახალხო დამცველი სტრასბურგში ევროპის საბჭოს ადამიანის უფლებათა კომისარ დუნია მიატოვიჩს შეხვდა და საქართველოში ადამიანის უფლებების მდგომარეობის შესახებ ინფორმაცია მიაწოდა. ომბუდსმენის აპარატში ამბობენ, რომ ნინო ლომჯარიამ კომისარს მიაწოდა ინფორმაცია იუსტიციის მინისტრისა და იუსტიციის სამინისტროს დაქვემდებარებული სპეციალური პენიტენციური სამსახურის მიერ სახალხო დამცველის პატიმრებთან შეხვედრის კონფიდენციალური ინფორმაციის გასაჯაროების შემთხვევების შესახებ. სახალხო დამცველი მიიჩნევს, რომ ეს პერსონალური მონაცემების უკანონო გასაჯაროება და სისხლის სამართლის კოდექსით დასჯადი ქმედებაა.ომბუდსმენის აპარატის ინფორმაციით, ნინო ლომჯარიამ ადამიანის უფლებათა კომისარს პროცესზე დაკვირვება და სახალხო დამცველის, როგორც ადამიანის უფლებათა ეროვნული ინსტიტუტის მხარდაჭერა სთხოვა. გარდა ამისა, ევროპის ადამიანის უფლებათა კომისართან შეხვედრაზე განიხილეს საქართველოს ტერიტორიაზე ე.წ. უკანონო ბორდერიზაციის პროცესი, საზღვრისპირა სოფლებში მცხოვრები ადამიანების სოციალურ-ეკონომიკური მდგომარეობა და უსაფრთხოების საკითხები. აპარატის ცნობით, სახალხო დამცველმა აღნიშნა, რომ ე.წ. გამშვები პუნქტების ჩაკეტვა რეგიონში ჰუმანიტარულ კრიზისს იწვევს და კომისარს ამ საკითხებთან დაკავშირებით გააქტიურება სთხოვა.
"საუბარი ასევე შეეხო ასევე, სასამართლოს დამოუკიდებლობის, შეკრებისა და გამოხატვის თავისუფლების მიმართულებით არსებულ გამოწვევებს, არასამთავრობო სექტორზე და ადამიანის უფლება დამცველებზე განხორციელებული ზეწოლის ფაქტებს", - აღნიშნავენ სახალხო დამცველის აპარატში.
მათივე ინფორმაციით, შეხვედრას სახალხო დამცველი მოადგილეებთან: თამარ გვარამაძესთან, გიორგი ბურჯანაძესთან და ეკატერინე სხილაძესათან ერთად დაესწრო.
იუსტიციის მინისტრი, თეა წულუკიანი, სახალხო დამცველს 21 იანვარს, ადამიანის უფლებათა კომიტეტის სხდომაზე დაუპირისპირდა, სადაც ციხეებში მდგომარეობის შესახებ სახალხო დამცველის სპეციალურ ანგარიშს განიხილავდნენ. მინისტრმა სახალხო დამცველი გააკრიტიკა და უთხრა რომ მისი წარმომადგენლები პატიმრებთან დახეული ჯინსებით დადიან, რაც შეუფერებელია. მან კომიტეტზე პატიმართან შეხვედრის ვიდეოც აჩვენა, რომელიც მოგვიანებით, სპეციალური პენიტენციური სამსახურის ფეისბუქ გვერდზე გამოქვეყნდა.
23 იანვარს, სპეციალურმა პენიტენციურმა დაწესებულებამ გაავრცელა განცხადება, სადაც წერდნენ, რომ სახალხო დამცველი და მისი მოადგილე გიორგი ბურჯანაძე ე.წ მატროსოვის ციხეში ბრალდებულ ირაკლი ოქრუაშვილს, მსჯავრდებულ ვანო მერაბიშვილს, ასევე 2006 წლის 2 მაისის, ე.წ. კორტების სპეცოპერაციის საქმეზე მსჯავრდებულ კახაბერ ნაკანს შეხვდა.
24 იანვარს, ლომჯარია თეა წულუკიანის მიერ სახალხო დამცველის პატიმრებთან ვიზიტის შესახებ ინფორმაციის გასაჯაროებას ბრიფინგით გამოეხმაურა და იუსტიციის მინისტრის მიერ ომბუდსმენისთვის ხელშეშლის ფაქტზე გამოძიების დაწყება მოითხოვა. ამის შემდეგ პენიტეციურმა სამსახურმა გაავრცელა განცხადება, სადაც წერია, რომ კანონდარღვევებზე ლომჯარიას დასახელებული ნორმები არარელევანტურია.