საქართველოს პარლამენტის ოპოზიციონერი დეპუტატი "ნაციონალური მოძრაობიდან" რომან გოცირიძე ამბობს, რომ საქართველოს პრემიერ-მინისტრმა, ირაკლი ღარიბაშვლმა გაეროში სიტყვით გამოსვლის დროს "ტყუილების კორიანტელი დააყენა". ამის შესახებ მან პარლამენტის ტრიბუნიდან ჯანდაცვის მინისტრის, ზურაბ აზარაშვილის მოსმენის შემდეგ ისაუბრა.
"რადგან ღარიბაშვილის სიცრუე ვახსენე, მოირგო საგარეო კოსტიუმი, გამოვიდა გაეროში და იძახის ევროკავშირი გვინდა, ამერიკა გვინდაო, მერე ჩამოვა, ამ კოსტიუმს გადაიცვამს მეორე მხრიდან, წითელი კოსტიუმით დაგვიდგება, აქ მჯდარი ოთხეულის სახით და მერე ამერიკას და ევროკავშირს ლანძღავს. სხვათა შორის, ეს ხალხი ["ოთხეული"] გადასვით იქით რა - ხომ ისხდნენ კაჭრეთში თქვენთან, რატომ ანაგვიანებენ ამ სივრცეს?! გადასვით ოპოზიციური ფლანგიდან უმრავლესობის ფლანგზე, არავინ არ ჭამს მაგას ისედაც, ყველამ იცის ვინ რა არის!" - თქვა რომან გოცირიძემ.
მმართველი პარტია არ ემიჯნება უმრავლესობის ოთხ წევრს იმ ბრალდებებში, რომელშიც ისინი საქართველოს პარტნიორ ქვეყნებს "მეორე ფრონტის" გახსნის სურვილსა და ოპოზიციის გეგმების მხარდაჭერაში ადანაშაულებენ. დიმიტრი სამხარაძის, სოზარ სუბარის, მიხეილ ყაველაშვილისა და გურამ მაჭარაშვილის განცხადებები არაერთხელ გავრცელდა.
ერთ-ერთ ბოლო განცხადებაში, რომელიც 19 სექტემბერს გავრცელდა, ოთხმა დეპუტატმა თქვა, რომ ამერიკული დაფინანსების მნიშვნელოვანი ნაწილი მოხმარდა სახელმწიფოს და ეკლესიის წინააღმდეგ მიმართულ კამპანიებს.