აშშ–ის პრეზიდენტ ჯო ბაიდენის განცხადებით, რუსეთი დაუშვებს "სერიოზულ შეცდომას", თუ უკრაინაში არატრადიციულ იარაღს გამოიყენებს.
"რუსეთი წარმოუდგენლად სერიოზულ შეცდომას დაუშვებს, თუ უკრაინაში გამოიყენებს ტაქტიკურ ბირთვულ იარაღს. ამ ეტაპზე არ შემიძლია, განვაცხადო, რომ ეს არის "ცრუ დროშის" ოპერაცია. ეს ჩვენ არ ვიცით. თუმცა ეს [ბირთვული იარაღის გამოყენება] იქნება სერიოზული შეცდომა“, – განაცხადა ბაიდენმა.
ამერიკელი ოფიციალური პირები აცხადებენ, რომ ისინი ამ ეტაპზე ვერ ხედავენ მტკიცებულებებს, რომ რუსეთი ამჟამად ემზადება, უკრაინაში გამოიყენოს არატრადიციული იარაღი, როგორიცაა "ბინძური ბომბი".
ცნობისთვის: 23 ოქტომბერს რუსეთის თავდაცვის მინისტრმა სერეგი შოიგუმ სატელეფონო საუბრები გამართა დიდი ბრიტანეთის, საფრანგეთის და თურქეთის თავდაცვის მინისტრებთან და უთხრა, რომ რუსეთი შეშფოთებულია უკრაინის მხრიდან „ბინძური ბომბის“ შესაძლო გამოყენებით. იმავე დღეს, შოიგუ ტელეფონით ესაუბრა აშშ-ის თავდაცვის მინისტრსაც. ამ საუბრების შემდეგ, საფრანგეთმა, დიდმა ბრიტანეთმა და შეერთებულმა შტატებმა განაცხადეს, რომ უარყოფენ რუსეთის აშკარად ცრუ ინსინუაციებს, თითქოს, უკრაინა თავის ტერიტორიაზე აპირებს „ბინძური ბომბის“ გამოყენებას.
"ბინძურ ბომბს" უწოდებენ ასაფეთქებელ მოწყობილობას, რომელიც რადიოაქტიურ ნივთიერებებსაც შეიცავს.