თურქეთი რუსეთს მარცვლეულის შეთანხმების არგაგრძელების თაობაზე მიღებული გადაწყვეტილების გადახედვისკენ მოუწოდებს. ამის შესახებ თურქეთის თავდაცვის მინისტრ ჰულუსი აკარისა და რუსეთის თავდაცვის მინისტრ სერგეი შოიგუს შორის გამართული სატელეფონო საუბრის შემდეგ გახდა ცნობილი.
„სავარაუდოა, რომ გადაწყვეტილება მარცვლეულის ექსპორტის ინიციატივის შეჩერების შესახებ, რომელიც მთლიანად ჰუმანიტარული აქტივობაა, გადაიხედება“,– ნათქვამია თურქეთის თავდაცვის სამინისტროს მიერ გავრცელებულ განცხადებაში.
თავის მხრივ, რუსეთის თავდაცვის უწყება აცხადებს, რომ „მიუღებელია გემების გადაადგილება შავი ზღვის უსაფრთხოების დერეფნის გავლით".
„მიუღებელია გემების გადაადგილება შავი ზღვის უსაფრთხოების დერეფნის გავლით, რადგან უკრაინის ხელმძღვანელობა და უკრაინის შეიარაღებული ძალების სარდლობა მას რუსეთის ფედერაციის წინააღმდეგ სამხედრო ოპერაციების ჩასატარებლად იყენებს“, - ნათქვამია რუსეთის თავდაცვის სამინისტროს განცხადებაში.