ევროპარლამენტის რეზოლუციას, რომელიც 9 ივნისს მიიღეს, ირაკლი კობახიძე ისევ პოლიტიკურად მიკერძოებულს უწოდებს და ამბობს, რომ "ჩალის ფასი" აქვს.  ჟურნალისტების კითხვაზე, რომ რეზოლუციაში წერია, რომ პოლიტიკური მართლმსაჯულება უნდა შეწყდეს, მათ შორის მედიამენეჯერების წინააღმდეგ, კობახიძე პასუხობს:

"ევროპარლამენტის რეზოლუციას ჩვენთვის ჩალის ფასი აქვს. არის პოლიტიკურად მიკერძოებული და კონკრეტული ინტერესი აქვს, რაც ამ რეზოლუციის ინიცირების უკან იდგა. აქედან გამომდინარე, რეზოლუციას აქვს ჩალის ფასი და მის თითოეულ ჩანაწერს ჩვენთვის ჩალის ფასი აქვს. კიდევ ერთხელ გავიმეორებ, რომ ევროკომისიამ და ევროპულმა საბჭომ რეზოლუცია ამ ნაწილში არ გაიზიარეს. ეს ძალიან მნიშვნელოვანია“, – განაცხადა ირაკლი კობახიძემ.

საქართველოში მედიაგარემოსთან დაკავშირებით ევროპარლამენტმა რეზოლუცია 9 ივნისს მიიღო. რეზოლუციაში საუბარია ნიკა გვარამიას შესახებ. ევროპარლამენტარები გმობენ "მთავარი არხის" დირექტორისთვის გამოტანილ განაჩენს.