რუსეთის მთავრობამ მოამზადა კანონპროექტი, რომლის თანახმად, უცხოეთის მოქალაქეები რუსეთის პასპორტს პირველად მოქალაქეობაზე უარის უთქმელად მიიღებენ, ანუ აღარ ექნებათ ვალდებულება, რუსეთის მოქალაქეობის მიღებამდე პირველად მოქალაქეობაზე უარი თქვან. „კომერსანტის“ ცნობით, კანონპროექტი სახელმწიფო სათათბიროს უკვე თებერვალში წარედგინება.
ამასთან, საკანონმდებლო შესწორებების ერთ–ერთი ავტორის ლეონიდ კალაშნიკოვის ინფორმაციით, „რუსეთის მოქალაქეობის შესახებ“ კანონში შესაძლოა, რიგი სხვა შესწორებებიც შევიდეს, კერძოდ, გაუქმდეს ნორმები მოქალაქეობის მიღების მსურველის ქვეყნის ტერიტორიაზე მინიმუმ, 5 წლის განმავლობაში ცხოვრებისა და შემოსავლის წყაროების დადასტურების აუცილებლობის შესახებ.
ცნობისთვის: კანონპროექტი 2019 წლის მარტში პრეზიდენტ პუტინის დავალებით ჩამოყალიბებულმა სპეციალურმა სამუშაო ჯგუფმა იმ კონცეფციის ფარგლებში მოამზადა, რომელიც რუსეთში რაც შეიძლება, მეტი ახალი მოქალაქის, სულ მცირე, 5–10 მილიონის მიზიდვას ითვალისწინებს.