"ქართული ოცნება" ძალადობას ახალისებს - ირმა ნადირაშვილი ახალქალაქში მომხდარ დაპირისპირებაზე
სახელმწიფომ დაპირისპირება ვერ შეაჩერა - ასე აფასებენ "ევროპული საქართველოს" წევრები ახალქალაქში გუშინ, 8 აგვისტოს განვითარებულ მოვლენებს. პარტიის წევრმა ირმა ნადირაშვილმა მთელი პასუხისმგებლობა მომხდარზე ხელისუფლებას და პირადად ბიძინა ივანიშვილს დააკისრა. ნადირასვილის თქმით, სწორედ "ქართული ოცნება" ახალისებს კრიმინალური სამყაროს წარმომადგენლებს და უკონტროლო სროლებიც ქუჩებში ამის შედეგია.
ჩვენ გვქონდა სურათი, როდესაც ათეულობით ადამიანი ქალაქის ცენტრში ერთმანეთს ესროდა, უპირისპირებდებოდა, ეს კონფლიქტი შემდეგ ქალაქის ცენტრიდან გადავიდა საავადმყოფოსთან, სადაც 15 მეტრში არის უშიშროების მთავარი სამმართველო. როდესაც უმაღლესი საკანონმდებლო ორგანოს წევრი დარბის ახალქალაქში და იარაღი ჩნდება ხალხის წინაშე, შემდეგ მას არ უჩერებენ უფლებამოსილებას, არ მიდის ციხეში, ეს არის ძალადობის წახალისება, - ამბობს ირმა ნადირაშვილი.შეგახსენებთ, გუშინ, 8 აგვისტოს დაახლოებთ 19:00 საათზე ახალქალაქში ახალგაზრდები ერთმანეთს დაუპირისპირდნენ, ჩხუბი ხელკეტების გამოყენებით მოხდა. დაპირისპირების დროს ცეცხლსასროლი იარაღიდან გასროლის შედეგად ერთი ადამიანი გარდაიცვალა. გარდაცვლილის თანასოფლელები ინციდენტის შემდეგ ახალქალაქში ჩავიდნენ, რის შემდეგად დაპირისპირებამ ფართომასშტაბიანი ხასიათი მიიღო. ახალქალაქში გადამწვარია რამდენიმე საცხოვრებელი სახლი და ერთი სასტუმრო. რა გახდა დაპირისპირების მიზეზი, ჯერჯერობით უცნობია.