ესპანეთში კორონავირუსის მსხვერპლთა რაოდენობა იკლებს. ბოლო ერთ დღეში კორონავირუსით 605 ადამიანი დაიღუპა. ინფორმაციას ესპანური გამოცემა „ელ პაისი“ ქვეყნის ჯანდაცვის სამინისტროზე დაყრდნობით ავრცელებს. ესპანური მედია წერს, რომ მსხვერპლის მსგავსი დაბალი მაჩვენებელი 24 მარტის შემდეგ პირველად აღინიშნა. 9 აპრილს ქვეყანაში კორონავირუსით 683 ადამიანი დაიღუპა. საერთო ჯამში, ესპანეთში კორონავირუსით დაღუპულთა რაოდენობა 15 843-მდე გაიზარდა.
10 აპრილის მონაცემებით, ქვეყანაში კორონავირუსი 157 022 ადამიანს დაუდასტურდა, 55 668 უკვე გამოჯანმრთელდა. 10 აპრილს, ესპანეთის მინისტრთა საბჭოს საგანგებო შეხვედრა გაიმართება. ესპანეთში საგანგებო მდგომარეობა სავარაუდოდ 10 მაისამდე გახანგრძლივდება.