გიორგი გახარია თვლის, რომ ის, რაც ბოლო 30 წელში ვერ შეძლო ვერც ერთმა პოლიტიკურმა ძალამ, შეძლო "ქართულმა ოცნებამ".
გახარია ამბობს, რომ სრულად პროპორციულ საარჩევნო სისტემას მხოლოდ ქართული ოცნება დათანხმდა, თუმცა აღარფერს ამბობს ამ სისტემის ჩაგდებაზე პარლამენტში და ე.წ. მაჟორიტარულ ამბოხზე

"უნდა გვესმოდეს, რომ დემოკრატიზაციის პროცესი არის საკმაოდ რთული. მიზანი და გენერალური ხაზი, რა თქმა უნდა, იყო სწორი, მაგრამ როგორც ჩანს, ცოტა უფრო მეტი მუშაობა მოგვიწევს. სწორედ ამისთვის არის გადადგმული ის ნაბიჯი, რომელიც ვერც ერთმა პოლიტიკურმა ძალამ, ბოლო 30 წლის განმავლობაში ვერ შეძლო, ეს შეძლო „ქართულმა ოცნებამ“, როდესაც დათანხმდა სრულად პროპორციულ საარჩევნო სისტემას" მიმართა გახარიამ ქართველ ელჩებს ყოველწლიურ კონფერენციაზე, რომელიც წელს ონლაინ რეჟიმში ტარდება.

გიორგი გახარია ოქტომბრის არჩევნებსაც ეხმაურება და ამბობს, რომ ამომრჩევლის აქტიურობის შედეგად, ქვეყანამ მიიღო მრავალპარტიული პარლამენტი:

ხაზგასმით აღვნიშნავ, პანდემიის პირობებში, დაახლოებით 2 მლნ მოქალაქე, სრული პასუხისმგებლობით მივიდა საარჩევნო ყუთთან და მისცა ხმა, შედეგად ჩვენ მივიღეთ პარლამენტი, სადაც გვყავს 9 პოლიტიკური ძალა, პირველად, ქვეყნის ისტორიაში და მივიღეთ პარლამენტი, რომლის დიდი ნაწილიც არის არჩეული პროპორციული სისტემით", - მიმართა პრემიერობის კანდიდატმა ელჩებს.

პრემიერის შეფასებით, ეს არის დემოკრატიული პროცესის პროგრესი, რომელსაც არსებული პოლარიზაცია საფრთხეს უქმნის.
გახარიამ დიალოგის პროცესში ჩართულ საერთაშორისო პარტნიორებს - ფასილიტატორ ელჩებს  მადლობა გადაუხადა.