ე.წ. კარტოგრაფების საქმეში მესამე პრეზიდენტის გვარი ოფიციალურად გამოჩნდა. პირველი ჩვენება, სადაც მიხეილ სააკაშვილს ასახელებენ, ყოფილ პრემიერმინისტრს, ზურაბ ნოღაიდელს ეკუთვნის. 
ნოღაიდელის ჩვენების შინაარსი დაკავებული ნატალია ილიჩოვას ადვოკატმა, ნესტან ლონდარიძემ გაასაჯაროა. ადვოკატი ამბობს, რომ ნოღაიდელი კონკრეტულ და ხელშესახებ ინფორმაციას არ იძლევა და მეტიც, მას საერთოდ არ ჰყავს ნახსენები ივერი მელაშვილი და ნატალია ილიჩოვა.
ადვოკატს ეს უმყარებს ეჭვს, რომ საქმე პოლიტიკური ნიშნით იკერება და ილიჩოვა და მელაშვილი მხოლოდ იმდროინდელი მაღალი თანამდებობის პირებზე გასვლის მოტივით არიან დაკავებულები.
როგორც ლონდარიძე ამბობს, ყოფილი ზურაბ ნოღაიდელი ვერ იხსენებს სადემარკაციო კომისიის წევრების ვინაობას და ამბობს, რომ ის კომისიაში ფორმალურად იყო, სინამდვილეში კი  ერთპიროვნულ გადაწყვეტილებას პრეზიდენტი იღებდა.
გარდა ამისა, ნესტან ლონდარიძის ინფორმაციით, გამოძიების საქმის მასალებში არ დევს წერილი, რომელიც ნოღაიდელმა მის აზერბაიჯანელ კოლეგას მისწერა. არსებული ინფორმაციით, ნოღაიდელი წერდა, რომ დავითგარეჯის ის ძეგლები, რომელიც აზერბაიჯანის ტერიტორიაზეა, სავალალო მდგომარეობაშია და სასწრაფოდ აღდგენას საჭიროებდა. 
ზურაბ ნოღაიდელი ე.წ. კარტოგრაფების საქმეზე" საქართველოს პროკურატურამ რამდენიმე დღის წინ გამოკითხა. ნოღაიდელს დეტალურად არ უსაუბრია რა კითხვები ჰქონდა მასთან შოთაძის უწყებას.
დღეს გამოძიებაზე კომენტარი პრემიერმინსტრმაც გააკეთა და მესამე პრეზიდენტის წინააღმდეგ სისხლის სამართლის დევნის დაწყება არ გამორიცხა.