"პროკურატურას თავზე ჩამოემხო გათეთრების საქმე!", - ასე გამოეხმაურა ე.წ. ფულის გათეთრების საქმეზე ბრალდებული ავთანდილ წერეთლის შვილი, ვატო წერეთელი თბილისის საქალაქო სასამართლოს მიერ ცოტა ხნის წინ მიღებულ გადაწყვეტილებას. 
როგორც მან აღნიშნა, მიუხედავად იმისა, რომ ბრალდებულებს პატიმრობა არ შეეფარდათ, სასამართლოს გადაწყვეტილებას აუცილებლად გაასაჩივრებენ.

"პროკურატურა არის პოლიტიკურად მიკერძოებული. სამი წელი რატომ გვატარეს?! პრაქტიკულად 3 წელი დაპატიმრებული იყო ჩემი ოჯახი და ვიყავით შტურმის ქვეშ, რისთვის ვიარეთ სასამართლოზე? რა თქმა უნდა, გადაწყვეტილებას, რაც არის, კი, შეიძლება ციხეში არ მიდის, მაგრამ აუცილებლად გავასაჩივრებთ. რას ნიშნავს თაღლითობა, სადაც არც გამოძიებაა ჩატარებული, არც არაფერი, აუცილებლად გავასაჩივრებთ. ბოლომდე ვიბრძოლებთ. მთელი სამყარო არ ცნობდა, რომ არანაირი გათეთრება არ იყო პროკურატურის გარდა. ეს იმას არ ნიშნავს, რომ რამე დამთავრდა. ბოლომდე ვიბრძოლებთ ჩვენი ოჯახის რეპუტაციისთვის", - თქვა ვატო წერეთელმა. 

ცნობისთვის, თბილისის საქალაქო სასამართლომ მამუკა ხაზარაძე, ბადრი ჯაფარიძე და ავთანდილ წერეთელი დამნაშავედ ცნო, თუმცა დანაშაულის ხანდაზმულობის გამო, საპატიმრო სასჯელისგან გაათავისუფლა. აღსანიშნავია, რომ გამოძიება ბრალდებულებს ფულის გათეთრებას ედავებოდა, თუმცა მოსამართლე ეს მუხლი გადააკვალიფიცირა და ისინი თაღლითობაში ცნო დამნაშავედ.